Advertisement

Select Page

月經杯有啲咩好處?

月經杯有啲咩好處?

月經杯,moon cup / menstrual cup , 一種近年流行嘅衛生巾/綿條替代品。今次詢眾要求,我都開post 講一下。

這種用品,鍾意嘅人就非常喜歡,唔鍾意嘅就非常抗拒,用起上嚟,因為都有佢小小唔方便嘅地方,所以都唔係好多人一講就接受到。咁,佢有啲咩好處呢?

1. 一定係環境保護先。女人一生所使用嘅衛生用品數以萬計,普普通通一個月用20條衛生巾計,咁收經之前一位女性都應該用到10000件左右。全世界咁多女人,個地球要分解咁多用完嘅衛生巾,真係非常之困難。所以從環保角度,月經杯係呢方面極度偉大嘅發明,環保人士必須認真留意!

2. 月經杯嘅設計本身就會幫你測量埋月經份量,每次清潔嘅時候睇一睇,唔會好似超級衛生巾咁,令人underestimate 自己嘅月經流量。

3. 去廁所行出行入唔需要特登用手攞住衛生用品,用完之後冇垃圾,可以做到神不知鬼不覺,就算有變態奶奶鍾意檢查垃圾桶,都唔會知道你幾時來過月經。

4. 真空原理,經血能夠接觸空氣嘅機會比較少,減少身體散發異味嘅機會(記唔記得一個衛生巾廣告,個女仔睇戲行過一個男仔塊面前面,都唔驚俾人’ 聞到’ ? )

5. 又係真空效果,就算去游水同埋浸溫泉,都唔使驚有血液流出,安排假期就唔使成日驚同月經撞期。

6. 長遠來講經濟實惠,用返一年以上就同用一年衛生巾差唔多價錢。即係嚟緊嘅日子基本上都係free 嘅 。

7. 唔使成日夾着衛生巾,陰部清爽好多,感覺舒服,唔會焗住,減少陰部過敏同埋磨損嘅情況 ,仲唔會’現晒形’ !

好多女性有疑惑,用個杯塞住陰道,會唔會多咗陰道炎呢?

有幾個研究發現,係非洲地方嘅一批年輕女子身上,發現到相比起使用其他衛生用品,似乎用menstrual cup 嘅女仔係少咗某種陰道炎( bacterial vaginosis )嘅出現添喎!即係話,如果你經常有陰道炎,或者可以考慮試吓呢個方法, 睇吓幫唔幫到你少啲復發。

咁用Menstrual cup 有冇咩害處呢?

我最近睇過一啲報告,害處唔係話完全無,不過好少啫!

1. 有病人放咗入陰道之後無法取出,要到醫院求救。

2. 有病人因為杯邊壓着佢嘅輸尿管,造成類似腎石嘅痛楚,不過攞返出嚟就冇事( 但係俾人做咗一大堆檢查先至發現問題所在)

3. 2015年有一個報告,病人用moon cup 後患上如同使用tampon後所 造成的toxic shock syndrome , 需要進入深切治療部。由於經血儲存在杯內長時間後,內裏成份適合一種特別嘅金黃葡萄球菌生長,引致相關毒素大增,造成敗血症。不過咁多年來,得呢個case report , 即係可能得壹~~~個病人發生過咁大把。所以我覺得風險好低,最緊要定時清理乾淨。

4. 有人會覺得放左入去之後唔多舒服( 咁外用嘅衛生巾都唔多舒服姐) 
5. 有啲人放得唔好,出現漏M嘅情況。
6. 帶緊子宮環嘅人士,有機會拉出拉入嘅時候拉出個子宮環!不過我覺得其實剪短啲條線就冇事啦!

我都好鼓勵各位女士使用月經杯,因此,我決定提供一種全新嘅服務,就係~~~~~月經杯fitting 諮詢服務啦! 有需要嘅朋友,下次帶埋你個杯來,幫你睇睇問題所在吖!我好樂意為你地服務㗎!

來源:網上圖片

No automatic alt text available.

MegaKids Shop生活·家庭·美麗: 主力嚴選世界各地最優質的天然(Natural)有機(Organic)產品帶給喜歡綠色健康生活(Green Healthy Life)的你. 更有多款無麩(Gluten-free)產品供你選擇. 希望大家能有綠色健康的優質生活!

Advertisement

About The Author

陳少慧醫生

- 婦產科專科醫生 - Specialist in Obstetrics & Gynaecology - 香港中文大學內外全科醫學士 MBChB(CUHK) - 英國皇家婦產科醫學院院士 MRCOG - 香港婦產科學院院士 FHKCOG - 香港中文大學內科醫學文憑 Dip Med (CUHK) - 英國皇家兒科醫學院兒科文憑(國際) DCH (International) - 香港醫學專科學院院士(婦產科) FHKAM (Obstetrics & Gynaecology) - 香港中文大學家庭醫學名譽臨床助理教授 Clinical Assistant Professor (Honorary) in Family Medicine, CUHK Professor (Honorary) in Family Medicine, CUHK

Leave a reply

專欄分類

Recent Posts

[示範] BB沖涼及按摩技巧

Share This